المرأة ... هي اللي تدبر البيت

كان ياما كان في سالف العصر والاوان اسولفلكم سالوفه ولاتستغربون من العنوان فد ملك يملك وياما يمكل وسبحان العاطي الوهاب جان ضايج لان ماعنده ولد يخليه ولي عهد بعده ويملكه التاج وملكه وارضه عنده بنات تزوجن بقت بس اصغر وحده بيهم وبيوم من الايام الملك كان متالم من يشوف الوزراء كل واحد منهم ابنه وياه وهو ما عنده ولد حاولت الاميرة ان تخفف عن والدها الملك وكًالته يا ملكنه الرشيد ليش الاستهانه بالمرأه وليش تعتقد انك لازم يكون الك ولد النساء مساويات للرجال الملك عصب وكًالها شلون تساوين الرجال بالنساء؟ النساء ميكًدرن يدبرن امور بيتهن مو عاد امور مملكه البنت كانت شجاعه كًالتله لا بالعكس المرأة هيه اللي تدير امور البيت هيه المدبره لكل شؤون البيت الملك عصب وغضب وقرر ان يعاقب الاميرة بان يزوجها لافقر شخص واكسل شخص بالمملكه حتى يراويها انه المرأة متكًدر تدبر شي وانه الرجال هو اللي يدبر كل شي وامر الوزير يجيبله افقر واكسل شاب بالمملكة

راح الوزير جاب الشاب الياكل كشور الباكًله وكًال ماكو اتعس واكسل منهذا ميشتغل كلشي ولا يكًدي بس ياكل كشور الباكًله وينام بخرابة، كًال الملك جيبوها البنية وزوجوها اله وطردوها بطركًـ الثوب لبنية من صاحولها الملك يريدج لبست عقد الليرات جوه هدومها وراحت كًدام الملك الي زوجها من الشاب الياكل كًشور الباكًله واسمه حسن وطردوها من القصر.

من طلعوا بره حسن متعجب عباله ديقشمرون عليه كًالتله وين بيتك كًللها ما عندي بيت كًالتله وين تنام؟ خجل منها هواية ومعرف شيحجي من مستحاته من الاميرة اللي سووها مرته بالكًوة. كًلتله لتستحي كًول وين تنام الله يكفيها وونشوف تاليها. كًللها اكو فد خرابة كًريبة انام بيها. كًالت خل نروح الها وراحوا للخرابة ومن وصلوا شافت ما بيها كلشي غير كًونيه يدخل بيها وينام. من شافت لبنية هالحاله مكًالت كلشي وضحكت ومدت ايدها وكًطعت واحدة من الليرات مال العقد ونطتها لحسن وكًالتله روح بيع هالذهب وجيب النه غده بالباقي اشتري غزل صوف وشياش مال حياكة ونطته ليره لخ وكالتله بيع هاي واشتري فراش النه.

اخذ حسن الليرتين وهو مستحي من نفسه وراح سوه مثل ما كًلتله وجاب اكل وغزل وشياش وفراش وبعدما اكلوا وارتاحوا اخذت الغزل وكًعدت تحوك وسوت بعد ساعات ذاك البلوز الماكو مثله كًالتله روح ودي هذا البلوز لفلان بايع بالسوك الجبير وراح ينطيك حكًه دينارين اشتري بدينار خيوط غزل ويبقى دينار اكل وفواكه وتعال. وظلت يومين ثلاثة يومية تسوي بلوز ويروح حسن يبيعه بالسوك ويجيب لخيوط اللي توصي عليهن والاكل.

فد يوم همه كًاعدين كالتله حسن انته لازم تشوفلك شغل وميصير تظل بطال. كًللها ما اعرف اشتغل كلشي. كًلتله ميصير انته لازم تتعلم عقل تكًدر تروح تشتغل بالعمالة. وشكد ينطوك انعم الله. كًللها زين باجر اطلع ومثل مكًلها الصبح طلع اشتغل بالعمالة وشافه ابو الشغل شاب قوي ويشتغل زين انطاه يومية زينة وبعد ما حلو راح حسن للبيت بالطريق شاف فد رجال عنده فد دولاب عجيب رد يصيح ابو العقل هنا. تعال اشتريلك عقل تعال تعلم عقل. حسن تعجب وكًال لنفسه مرتي كًالت انته لازم تتعلم عقل اني راح اشتريلي عقل. راح للرجال اليصيح وكًله بيش تبيع عقل جاوب ميخالف وكان بهلكًد (بكًد اليومية اللي حصلها حسن( فكر حسن وكًال ميخالف باجر اشتغل بمكانها واحسب نفسي اليوم مامشتغل. انطه يوميته لابو العقل وكًله انطيني.
البياع اخذ الفلوس وراح يفتح مجرات وبوب ومخامر بالدولاب العجيب وبعد شويه عاين على حسن وكًال (الجميل هو العين وما تنظر والكًلب وما يشتهي) رد حسن هاذه هو العقل. الرجال ما حجه شيء شال الدولاب ماله ومشه. حسن تندم هواية عله فلوسه وكًال قشمرني واخذ فلوسي. ومن وصل للبيت تلكًته الاميرة محضرتله مي للسبح وهدوم نظيفة واكل زين لكن من شافته حزين كًالتله لتدير بال باجر تشتغل بمكانها كًوم كًوم اسبح وظلت تحاجي بالزين لمن كًام سبح وبدل واكل وطلع باع شغل مرته واشترى حاجاتهم.

ثاني يوم طلع للشغل وحصل يومية اكثر من كًبل ورجع للبيت وظل هو ومرته يشتغلون عله بركة الله لمن تعدلت امورهم وشتروا الكًاع مال الخرابة وعمروا بيها بيت وظلوا عايشين بسعادة.

فد يوم كًالتله الاميرة لحسن انته دتتعب بشغل البنه واحنه حالنا زين لازم تلكًيلك شغل اسهل وبيه فلوس اكثر وماكو احسن من التجارة. رد عليها اني ما اعرف اشتغل بالتجارة وخاف فلوسنة تروح كًالتله لا روح شوف التجار شيشترون شيبيعون وسوي مثلهم حسن طلع لسوكًـ التجار وظل يسال ويشوف ويفتهم الشغلة وسال علكروان مال التجار يمته تمشي ورجع عله مرته ودرسوا القضية. اشتروا اموال هواية يروح يبيعها بغير بلاد ويجيب بضاعة مناك ويبيع بلبلاد مالهم ومشه ويه القافلة وتوكل عله الله وظلوا يمشون ايام وليالي من مكان المكان يبيعون ويشترون فد يوم وصلوا لمكان ما بي مي لان كل بير ينزلون بي يلكوه يابس. ظلوا متحيرين منين يجيبون مي الهم وللحيوانات مالهم. جان اكو هناك فد بير الينزل بيه ميطلع ولكن من لا جارة جابوا ذاك البير بالطاري لكن منو اللي يكدر ينزل بالبير ويسكي الكروان وبعدما شبعوا حجي كًام حسن وكال: اني انزل بالبير وما اخليكم عطشانين. كًلوله يمعود وسفه عله شبابك.
كاًل ابد لازم انزل كًلوله خطيتك بركًبتك احنا معلينا راحوا للبير ذاك وشدوا حسن ونزلو بذاك البير وبعد ما خله رجله عله كًاع وفد ايد عملاقة تجره بصفحه وميشوف نفسه الا بفد غرفة مرمر تضوي عبالك نهار ومو جوه البير. والشخص الي جره للغرفة كعد وجني بنات اثنين وحده سوده وخشمها افطس وخلقتها تخوف والاخرى مثل الشمس شكًره شعرها اصفر ذهب وعيونها خضر كبار وماكو احلى منها. ومن شاف حسن هالمنظر تعجب وظل حاير. صرخ عليه الاسود الجبار القبيح الخلقة وكًله شوف ماكو واحد نزل بهالبير وطلع سلامات وانت اذا محزرت ياهو الاجمل من ذني البنات اكًص راسك مثل اللي كًبلك.

حسن احتار شيجاوب اذا يكول الشكًره ليزعل الاسود لان السوده من جنسه واذا كال السوده يكًله الاسود كل هذا الجمال ميترس عينك وبالجوابين خايف لينكتل وظل ساكت. صاح عليه العملاق الاسود وكًله انته يبين هم مثل غيرك ما عندك عقل. وبذيج الساعة تفطن حسن عالعقل الى اشتراه باول يوميه حصلها وردها للاسود وكًلله الجميلة منهن هي العينك وما تنظر وكًلبك وما يشتهي. صفكًـ الاسود وضحك وكًله عفيه عليك اطلب اشما تريد تستاهل كًله حسن اريد مي لجماعتي فوك. كًله الاسود تعال اشوفك ودخله لغير غرفة متروسة طوابيكًـ كبار ذهب. وكله اخذ اشكد ميعجبك لكن اخاف اللي وياك اذا عرفوا عندك هلكد ذهب يكتلوك وياخذوه تعال سوي بالطين والتبن حتى يبين مثل طابوكً لبن ومحد يتعرضلك سوه مثل ماكًله وترس لجماعته مي وصاح عليهم نزلوه الحبل شد ليه طوابيكًـ الذهب اللي سواه بطين ولفها بهدومه وصعد ومحجه اللي صار بيه وحمل الطوابيك عالبعير وظل ويه القافلة لمن رجعوا للمدينة مالهم وتلكًته مرته الاميرة بالهلاهل والفرح وبعدما حجالها القصة وشلون شراية العقل تنفع. وبعدما باعوا الذهب اشتروا الكاع اللي كًبال قصر الملك وعمرو بيها احسن قصر واثثوا احسن اثاث ماكو منه بقصر الملك والملك يتعجب بصاحب القصر منين عنده هالمال.

فد يوم حسن عزم الملك وجماعته للبيت ومن دخلوا اتعجبوا وزاد العجب مالهم من قدمو لهم الاكل بمواعين من ذهب.
وجابوا الاكل اللي ماكو منه بالمملكة ذيج كًدام الملك وجماعته حتى خلص صبر الملك وصاح عله حسن: متكًلي انته منو.
بذيج الساع طلعت الاميرة ووكًفت كدام ابوها وكالت هذا رجل بنتك الصغيرة اللي جان ياكل كشور الباكًلة واني بنتك اللي طردتني واليوم راويتك شلون المره هي اللي تدبر البيت.

تعجب الملك وعرف نفسه جان غلطان ولازم ميحتقر المره والرجال هو موكلشي بالدنيا. تصالح ويه بنته ونسيبه وأخذهم عنده وسواه لحسن ولي عهده لأن ما جان عنده ولد.

قصه روعه جروحتي وهادفه

تقبلي ودي
جونه

انتِ الاروع عزيزتي جوجو وتسلمين عالمرور king

جروحة والله موضوع حلو بس هاي تصير حقيقة يعني ممكن هذا الشي يصير زين جروحة ملكيتي صفة للزوج غير هذا الوصف

فقير وكسول وفوكاها هم ميجدي بس ياكل كشور باكلة وينام بكونية بالخرابة هاي ليش جروحة يعني احنا منحل ولا نربط يعني

ماكو نسوان مو كسولات هسة اععدلج انواع النسوان الكسولات ياااااااا جروحة affraid

اولا- تنام ومتفرج سنونها

ثانيا-الصبح متغسل وجهها

ثالثا- البيت وصخ وممرتب

رابعا - اذن العصر والغدى مصاير

خامسا- هدوم الزوج وسخة وممكوية lol!

سادسا - الجهال اربعة وعشرين ساعة مطينين

سابعا -لازمة الريموت كنترول وتباوع المسلسلات

ثامنا - تنام ولو تنفجر يمها سيارة متكعد Very Happy

اعلناها حربا

موضوع: قصه خياليه .. الإثنين سبتمبر 08, 2008 4:03 pm

السلام عليكم ورحمه الله وبركاته
اول شئ تسلمين جروحه على الموضوع .
الموضوع قريته اكثر من مره

موضوع رائع بيه بعض
الخيال
تدبير المراءه
ولو المراءه عقلها صغير

راح تصير حرب
تحياتي جروحه موضوع رائع lol!

السلام عليكم

قبل كولشي ابو الهيل الورد تسلم عالمرور الحلوو

بعدين ليش متحلفين بيه انتو؟؟؟؟؟؟؟؟ شكًلت اني شحجيت هيه من البدايه كًلنه سالوفه قصه حجايه بيها عبره وحكمه وبنفس الوقت تسليه ليش كلها تعلن الحرب؟؟؟؟؟؟؟؟؟؟؟؟

هسه من نحجي تكًولون ليش يكولن مضلومات شلون بيكم بس تنفسنه بكلمه كلتو حرب شلون بالله الكلام عليه حروب؟؟؟؟

بعدين يا ابو الهيل الزين من الطرفين والشين من الطرفين

يعني لو ما حسن اللي بالروايه متفهم وممخلي فروقات بينه وبين مرته وشايف انه عقلها راجح وماخذ شورها جان مصار براسه خير مثل منكًول

بعدين لو فرضنه انه هو ابن ملك وانها بالصفات اللي ذكرتها تتوقع ممكن حياتهم تزدهر؟؟؟؟؟؟

النقاط اللي ذكرتها حلوه بس بالمقابل اكو شغلات للزلم ماتنجرع اذا تريدون خلو موضوع ونناقشها

الف شكر عالمرور مره ثاانيه

هههههههههههههههههههههههههههههههههه تسلم مووون عالمرور بس ليش هيجي بس سمعت بيها حرب عالنسوان جيت تركض؟؟؟؟؟

المراة بشر شنو عقولهن صعيره لا مو صغيرة بدليل بيهن عالمات ومخترعات منو كًالك العقل الكبير حكرا عالرجل وبس؟

مشكور مون الطيب تسلملي

Nice one jroo7a it shows what could you do if you really believe in, and what a person plans for and how miracles can come true ,lool jojo 7saan abo kshoor bagla thakrne be abo bleeela loooooooool

اختي العزيزة جروحة الغالية
شكرا الج على هاي القصة واللي المفروض الواحد من يقراهه يعرف اللي ورا هاي القصة وما هو المغزى وفعلا جروحة التاريخ ذكر لنا كم هائل من النساء الذين صنعن التاريخ ونساء وقفن خلف رجال صنعو التاريخ وانا اعتقد دائما ان المرأة عندما تقرر شيئا وتلح عليه فستصل اليه وتحققه فما حققته هذه الاميرة في قصتك مثال على ارادة المرأة عندما تريد
ايضا جروحة التاريخ ذكر لنا حوادث غيرت مجرى التاريخ كانت ابطالها النساء بصورة مباشرة او غير مباشرة اي استطعن تحريك الرجال الذين بيدهم القرار وتستطعين ان تاخذي امثلة كثيرة ابتداءا من قصة ابونا ادم وحواء وقرار الله تعالى في نزولهم الى الارض الى قصة كاهن اوروك في التاريخ العراقي القديم الى كليوباترا الى نفرتيتي وصولا الى ايفا براون عشيقة هتلر وكل هؤلاء نساء غيرن مجرى الاحداث في زمانهم وفيهم من اسهمت ايجابيا وفيهم من اسهمت سلبا ولكن الدرس المستخلص من كل هذه القصص ان لا وجود بغير المراة ولا حياة بدون المراة ويجب ان تعطى المرأة كل المساواة الكاملة مع الرجل لانها ان اهملت فحينذاك قد تنتفض ويا ويل الرجل منها
تحياتي جروحة وتقبلي مروري

تسلم يا هيومن الغاالي عالمرور الرائع المميز وشكرا لتعليقاتك الجميلة

الشئ الاخر الذي شد انتباهي بهذه القصة هو التفاهم بين الزوجين فلولا ان حسن متفتح العقل وبعيدا عن التعصب بالرأي والتشبث بالتقاليد البالية اللتي ياخذها البعض واقول البعض حجة لعدم اخذ النصيحة لكون الافكار البالية تملي عليهم ان عقول الرجل هيه وحدها القادرة على التفكير

الف شكر على المرور تسلم ياارب

جوجو عجبتني هالقصه كلش بس شي واحد ما عجبني بيها اكشور الباكله وكونيه الجنفاص Very Happy

بنت الفيحاء كتب:: جوجو عجبتني هالقصه كلش بس شي واحد ما عجبني بيها اكشور الباكله وكونيه الجنفاص

هههههههههه بنوته تسلمين عالمرور حيااتي ليش معجبتج صح كًشور الباكًله هوسه وتعالي نضفي بس كًونية الجنفاص حلوه من التراث مو بالله هههههههه تسلمين كًلب ونورتي المنتدى والله

كما تعودنا منك جروحتي كل يوم يزداد تالقاً وروعة في جميع ماتكتبين I love you

عاشت اناملك الجميله.. صحيح المرأه أذا أرادت ان تعمل شيء لا احد يستطيع ان يقف امامها....
و اكييد وراء كل رجل عظيم أمرأة عظيمة....
تقبليي مروري

تسلمين عمري شوشو عالمرور الحلووو والله خليت رد الج بس ما ادري وين صاار نص الردود والمواضيع طاارت يالله ان شاء الله ترجع مشكوره عمري I love you