السلام عليكم ورحمة الله وبركاته
اليوم كتبت لكم نبذه من حياة
الشاعر الشهيد المرحوم رحيم المالكي
رحمه الله
بناء على طلب الاخ هيومن
ولو ان الكلمات لم ولن تفي حق هذا الشاعر البطل الشهيد
ــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــ
الاسم .. رحيم طاهر جناح المالكي
مواليد .. 1962
ولد الشاعر المرحوم في محافظة ميسان
قضاء الكحلاء
اكمل دراسته المتوسطه في بغداد حيث
انتقلت عائلته اليها بعد وفاة والده واكمل الدراسه
الاعداديه في اعدادية الكرامه المسائيه
الفرع الادبي
...........................................
...........................................
اسس مع الشاعر فالح حسون الدراجي عام 1986
منتدى الشعر الشعبي في مدينة الثوره (مدينة الصدر حاليآ )
فاز بجوائز ومسابقات شعريه كثيره على مستوى القطر
حيث نال على ؟
الاولى 4 مرات والثانيه مرتين منذ عام 1990 فصاعدآ ,
كما حاز على جائزة الابداع عام 1996 من جمعية شعراء الشعب
.................................................. ............................
وهو اول من قرأ القصيدة الحسينيه على منبر جمعية الشعراء ليعطي
بذلك دفعه كبيره للشعراء الاخرين ليحذوا حذوه
كتب اجمل القصائد تلك الفتره ومنها الفرات وابو طالب ولا تلوم العين
وعلى بيبان الجنه وغيرها .
وكان لقائه بالسيد الشهيد الصدر انعطافة كبرى في حياته ليخرج بعد ذلك
بأروع القصائد .
حتى ان السيد الشهيد اهداه الكفن الذي يصلي به .
بعد استشهاد السيد كتب قصيدته الرائعه ثارك يا الصدر التي احجبت
المشاعر الوطنيه والاسلاميه ضد النظام
اعتقل في عام 2001بحجة تأليب الرأي العام ضد النظام
وامضى خلالها 6 اشهر في المعتقلات الحاكميه .
.................................................. .........................................
اما الشخصيات التي التقى بها فهي كثيره ولكن بأيجاز ., ؟
1 ـ السيد الشهيد محمد محمد صادق الصدر
2ـ السيد علي السيستاني دام الله ضله
3 ـ السيد محمد حسين فضل الله
..........................................
وبعد سقوط النظام عمل في فضلئية الفيحاء قضى خلالها قرابة العام
وبعد ذلك عمل في الفضائيه العراقيه ليقدم من خلالها اهم البرامج
اهمها ( هواجس ) وبرنامج (مضايف ) .
وكان همه الاول والاخير هو ان يرى عراقآ مزدهرآ ولذلك عمل من اجل
المصالحه الوطنيه من خلال قصائده الرائعه .
.................................................. ..................................
وفي 25\6\2007 كان الارهاب الاسود في العراق يخطط لضرب مؤتمر
المصالحه الوطنيه في فندق المنصور ليتم له ذلك فيخر الشهيد صريعآ
بحقد الاوغاد فكان مأتمآ كبيرآ للعراق عم الحزن عليه بكافة ارجاءه.
.................................................. .................................
لديه العديد من المجاميع المخطوطه
له من الاولاد حيدر وعلي ومن البنات سجى وضحى وصدى
.................................................. .....................
وعند استشهاده كتبت عنه جميع الصحف العراقيه والعربيه ونقلت وسائل الاعلام
الفضائيه مأتمه الكبير
فسلام عليك ايها الشاعر الكبير كلما اشرقت الشمس وكلما بزغ القمر
الفاتحة على روح الشهيد الشاعر رحيم المالكي ونرجو من الله ان يدخله فسيح جناته
واود ان اقدم لهذا البطل هذه البوذية
دهري هموم راواني ولا راح
وطرب لتضن يسلينه ولا راح
ورحيم المالكي باقي ولا راح
وية الدم هواه يدور بية
واود ان اقدم له ابوذية اخرى
رحيم المالكي بروحي ولازال
ما اظن انساك من عمري ولا زل
ورحيم المالكي باقي ولا زال
اسولف بيك صبح انة ومسية
لقد كان رمز للشعر ولقد خسرناه خسارة لكن(انا لله وانى اليه راجعون)
ووفاء منا لما قدمه هذا الشاعر العراقي المميز بشعره الرقيق وخصوصا في مجال الابوذية
اقدم لكم مجموعة من الابوذيات التي قدمها شاعرنا الشهيد في برنامج هواجس
حبيبي جروح الك بالروح حالا
وامس جنت احسن من اليوم حالا
اريدك تنتخيلي وتجي حالا
باجر وين ما تلحك عليه
تتنخه تريد اجيك اليوم بالحال
وانت اعرف حبيب الروح بالحال
شمحلها وياك ماتقتنع بالحل
ادليك الدرب وترد عليه
الحديث بشاهده كالو وربطه
مو كلمن لبس بدله وربطه
حجه وماضام زلاته وره ابطه
يسولف طن ولا تصفه وكيه
روحي المجد والعليه وكرها
الرؤس الخانعه اكطعها واكرها
اموت من البخل واهله واكرهه
وجريمه اشعر بخيل يسوس بيه
آنا الدوه لعلاتك وانا الداي
وجريمه انت اصبحت خصمي ونداي
المثلك حصو ما نكط ولاداي
الحصو بنص المحيط ويشع ميه
النوايب جلد صبري ما انزع الها
ولو بالقوس ما ظل منزع الها
حبيبه تروح عني منو زعلها
اذا تزعل يدور الفلك بيه
هاك اخذ الجروح وياك هارف
ها دك الكلب بجفاك ها رف
مثل خزلة غنم والشوف هارف
شتن مشن كل وحده بنويه
حليم وعقل عندك جنت ذا راي
وجنت نسمة عذيبي وصرت ذاري
شبيك وي الغنم سرحت ذاري
رايك والعقل راحن سويه
مصايب عالكلب نصبو وللو
الهلبت ما نفعني بعد واللو
احبابي بلا ذنب للغير ولو
طبعهم غدر مابيهم حميه
الزمان بفركتك حزين حزنا
وعلى كل الحزن والنوح حزنا
تعال اعلى الدليل وشوف حزنه
مغيم ما صفه ومخبوط ميه
انا الما اكرر بحجي ولا اعيد
ولا احسب بزلاتك ولا اعد
شمالك ما تمر بيه ولا عيد
الخلل مدري بجنابك مدري بيه
جثير هموم اعاين حاسبلها
وانا لايام ضيجي حاسبلها
صفت والذيب اجاها حاس ابلها
راعي البل غفه واثر عليه
وحك من كون الاكوان وابسط
انا اسهل من نسيم الريح وابسط
جنت املك مخدة صوف وبساط
الاجوني فرهدو ذني من اديه
ابد ما يرحم الطايح وكتنا
جمعنا ورجع طشرنا وكتنا
اصيح اعلى الفرح اوكف وك اتنه
تركني وما سمعني ورد عليه
شنفعني الجو يصاحب من خلالي
اخذ ربعي واخوتي من خلالي
جثيرة ذيول عبرت من خلالي
الزلم واشباهها عبرت عليه
*******************
وله ايضا قصيدة الفرات التي يقول فيها:
شلون تجري ومايك ازرك يافرات
وهذا ذنبك مو ذنب يفطـــــر سمه
تسابكت بالطف عله حسين السيوف
ومايك اول سهم في صدره انرمه
طاح ابو السجاد يم جرفك شهيد
بين سيفين العدى وسيف الضمه
عطش عبد الله التفرفح بين ايديه
كطع اكماطه ولعد مــايك ومــه
انفرط عقد الدين وجروفك تشوف
جان غرفة ماي منك تلضمه
عطشيت الدين عن بكرة ابيه
وكطعيت جفوف راعي الموزمه
تدري لو مايك وصل يم الخيام
جاروه العباس منهم صارمـــه
وجان ماردت رؤوس اعله الرئاب
وجان ردت خيلهم تكطر دمه
شلون يمك طاح عطشان الحسين
وماركض مايك يم جرحه ارتمه
طاعت اسماعيل صحراء الحجاز لبن
وانته شح مايك بيد حامي الحمه
ما اظن اسماعيل اكرم من حسين
ومـــا اظن امه اتقدم فاطمــه
ذاك ابن واحد سأل ربه الجليل
كيف تحي الموتى وترد قائمه
هذا ابن حيدر علي سيف الرسول
المايهاب دينه لومة لائمه
كوم طم روحك حدر كبرالحسين
واعتذر لله واطلب مرحمه
وشوف فرق البينك وبين الكرام
حسين شاف الدين عطشان الدمه
ضحى باخر قطره من دمه الشريف
وظلت اخر قطره من دمه قائمه
حسين لومنك شرب جان ارتويت
وجان تشرف مايك يلامس فمه
لكن انته الحظ عماك وانتهيت
وسوء حظك رادلك هالخاتمه
******************
ومن قصائده المميزه قصدية تانيتــــــــــــك :
https://www.youtube.com/watch?v=3VhvWsAEoVAتانيتك عمر يمك ردت ارتاح
لكيتك واحه ميته ترابتك تذري
تانيتك تجبره لخاطري المكسور
جبرته بدمع بس ماجبر كسري
ليش تغيضني وأحجي الحجي المضموم
وتكول الناس عني مسودن يهذري
أذا تدري بعذابي وتدري اللي صار
لا تسأل عليه شباقي من صبري
خلصت العمر مابين جويه واه
ومكالب بروحي وناركم حدري
ستوني الحزن مو كافي طفي النار
تبخر ماي صبري ونزرف جدري
يالرايد حجينه يضل جزر للدوم
وانت المد يفيدك ينمحي المقري
لان انت جرف وانه عليك الماي
اطلع عيوب جرفك لو كثر جزري
حاصرني الوكت وجروحي مسمومات
لا انت رحمتني ولا رحم دهري
تحزم جرح بيه وراد ياخذ ثار
التفت شاف الخناجر تطعن بظهري
*****************************
ومن اروع قصائد الشاعر الشهيد قصيدته التي خلد بها حروب الامام علي عليه السلام:
https://www.youtube.com/watch?v=TMXro4lmVzwبهاليوم هذا العلي حي مرضعه وحيدرة
نصبة الباري ولي والميت حيدرة
وصى الولاية لعلي طه النبي حيدرة
كال البكًلبه هوى لرب الجلاله ولي
خل يلتزم بالفتى هذا من بعدي ولي
طلگ الدنيا وزمخ يا دنيا عني ولي
ما بين النجوم حيدر بالخلايق بدر
ليل ومطرز ذهب مصيوغ كلله بدر
معروف يا ابا الحسن تشهدله وكفة بدر
امضى من اليوف وابشط من اصلهه وأحد
من قبل الارحام بالذر للجلاله وحد
صولات اله حيدرة تشهد بدرهه وأحد
الما يأمن بكل هذن بأشعارنه خندگه
ونچلب بياخته ونجرة من خندگه
عمر ابن ود من هتف يوم العبر خندگة
ويگول ماكو زلم في هالجمع خيبرة
ياهو التصدّة ووگف والرگبته خيبرة
وياهو اللي مرحب شطر ياهو القلع خيبرة
الباب سواه جسر عبروا عليه صفين
كل الخلايق علي بالمعجزة صفين
محتاج اسولف بعد واشرح حرب صفين
كرار شنوصفه بكل الشعر والجمل
رغم التامر بقة والامته والجمل
والله لوما المرة وحمارها والجمل
امة محمد علت والحادي ضل حيدرة
********************
وهذه المحاورة الرائعه من ضمن محاورات الشهيد الشاعر البطل مع الشاعر المبدع عريان سيد خلف
https://www.youtube.com/watch?v=u4nCH_01T5Qرحيم المالكي ...
عليك الليل كلة انة وانة
ومعاك العتب هسة انة وانة
التهدد بالنفاهة انة وانة
ويلك مو طبك دهري علية
عريان السيد خلف ...
نبي ونجبر خواطر من يبينا
وسر موس البكلبي من يبينا
اذا مرة انتخينا من يبينا
نهد العالية بعلو الثرية
رحيم المالكي ...
لائن طكات شماتي بهاماي
وشل لا تضن عيني بهاماي
اذا عذ الرضا يبصم بهاماي
اكطعة الجان يرضالي بردية
عريان السيد خلف ...
العلية غير اهلها من علاها
وروحي خسة الكلك من علاها
بعزم الله نخلتي من علاها
يراموها بحجر وتضل صخية
رحيم المالكي ...
انة روحي الليالي من رسنهة
الاصيلة انت تعرفهة من رسنهة
سيوفي مغمدتهة من رسنهة
ركاب عداي ومبردهن ادية
عريان السيد خلف ...
اعلي بالوصل روحي علني
وسوالفكم بدلالي علني
ليالي لجنت خازلهن علني
وغدت عجلة مخالبهن علية
رحيم المالكي ...
انة الواضح والمبين ولا خاف
وانة الما رجفن جدامي ولا خاف
وانة الما نكص وزني ولاخاف
اختفيت وخفت وزن العلية
عريان السيد خلف ...
يكلبي شكثر يحمل بعد يملاك
تعدى والعقل بالصبر يملاك
ابن ادم لو ملك قارون يملاك
وبلا اخلاق ما ينسهب مية
وبعد ........
مهما فعلت اعجز عن الايفاء ولو بشي يسير للشاعر رحيم المالكي
لمن يرغب بالقصائد الصوتيه ارجو اعلامي بذلك وساقوم لاحقا باضافة بعض المقاطع الصوتية
عذرا شاعرنا المبدع
عذرا اعضاء المنتدى
استميحكم عذار
مهما كتبت ومهما قلت
لن يكون نقطة في بحر روعة وابداع رحيـــــــــــــــــم المالكي رحمه الله
عذراا ابو حيدر الغالي
تحياتي لكم جميعا
جروح العراقية
الثلاثاء يوليو 19, 2011 8:38 am من طرف sohab
