اتصال هاتفي ويا الوطن والخط انكًطع

ألو ..
ألو ..
ألو ..

وطني .. حبيبي .. عمري ..
أرجوك ماأسمعك
بلكي تعلي الصوت
أسمع رصاص و بجي
وعبر الأسلاك الدمع
يوصل وريحة موت
أسمع صياح ولغط
ومناداه يا هَل الربع
خل نرفع التابوت
أسمع عياط ولطم
وأم تنعه يا هلَ الولد
يالغربت بسكوت
ويالجنت وكت المسه
بيدك تكًود الكمر
وتصيرله زاتوت
ويالكنت شمعة عرس
من تنطفي الكهربة
خدك يضوي بيوت
وجان الدرب يستحي
ويلوذ من خطوتك
لو ردت مره تفوت
مـاخـاف لـيل اليجي
مادام في معصمي
يوليدي تضوي بتوت .

ألو ..
ألو ..
ألو ..

مــاأســمعـك يـاوطـن
بالخط إجت وشوشه
وإرتفع صوت القصف
وصوت أَبو يكًل للولد
شـد روحـك بعـتبتك
يـاولـيدي لا تنخـطـف
البارحه أعلِنَوا:
مجموعه ذبحت شمس
والصبح شفنه الصور
نشرتها كل الصحف
وأنباء أخرى إجت
عن إغتيال النهر
من سَيَّرْ إعله الجرف
والثالثه عن حقل
حركوا ا ثيابه ومشِوا
والحال ما تنوصف
ومن قبل أول أمس
طَوقوا بيت اللغه
وباكًوا ا بقايا الحرف
شدينه إيد الشرف
والطيب والمرجله
وأطلقنه إيد العنف

ألو ..
ألو ..
ألو ..

يمكن الخط إنقطع
مَيْؤَوسْ من هالوضع
ماينصلِح هل الظرف .

ألو ..
ألو ..
ألو ..

آسف ولا ينسمع
والصوت مو الأولي
الصوت أحس مرتبك
ذبـلان ورد الحجي
بشفافك ومنكتل
من حقي لو كًمت أشك
آني عـرفـتك قبل
من تحجي ينزل رطب
والدنيا تمطر ضحك
وبكلشي أشوفك تهل
حتى الصبح من يجي
ويه الشمس تشترك
وما كان واحـد قبل
ياخذ ركًبتك غفل
لو صار وكت العرك
وما بالَغِت لو كًلت
كنت أويه موت النِزَلْ
لو زامطك تشتبك
والآن ياوطني:
دنكًت لأصغر قزم
والجان يحلم قبل
يوصل الحَد الورك
معقوله ياوطني
إتخلي الكًمر ينذبح

ألو ..
ألو ..
ألو ..

وطني .. حبيبي .. عمري
جن بلهاتك جَرِحْ
من تحجي أحِسْ مخننك
شــايل بجفك نــهـر
مـيت ونخله إنكـتل
مـــــــابـين إديـهـا العثك
شايـل بجفك وطــن
مذبوح من كل كتر
وبثوبـه ريحة حــرك
مـن جنت أبـوسك كًبل
خـدك يوَرِد هـوى
ومـثل الكًمر تعتلكًـ
والآن ياموطني
دم بلبل براحِتك :
يابس وريحة كتل
توصلني كلما تمر
نسمه إعله جثة
العشك
هم شفت قبلك وطن
جتاله شعبه وزرَع
بثيابه مِيَتْ فتك ؟
إحجي أريدْ أسْمَعَك
مايسوه باقي العمر
لوما تكًول الصدك
يالنعشَكًـ إعله الجتف

ألو..
ألو ..
ألو ..

وطني .. حبيبي .. عمري
الليله كاس الحزن
أرد أشربه بصحتك
مرت سنه من قهر
وسنين راحت تجي
وأنت على حـالتــك
دورت بين الصور
كًلت ألكًة بلكت ولو
شي باقي من ضحكتك
وفجأة:
إتفَجِرَتْ قنبله
مزروعه وسط الصور
والدم ترَسْ راحِتك
ودخان عالي إرتفع
ما كًمت أمَيّـز بعد
رجليك من هامِتك
كتلوك ياوطني
أهالوجوه الصفر
واللي كًرط ملحِتك
كًابلني شيل النعش
أرد آني أدفنك وأرد
أحجيلهــــــم قصِتك
لكن غريب الأمر:
إشلون أدفن ضوه
وياكًاع تكًدر تلم
ياموطني جثتك؟
تحياتي للوطن
شلته بعد ماشفت
كًطعوك من العِرِكًـ

وسِتْر الشمس ينهتك؟

اتصال هاتفي ويا الوطن والخط انكًطع 684198880

.

قصيدة جميله جروح

شكراا 007 وتسلم عالمرور